ចលនាមាតាធម្មជាតិ គឺជាក្រុមសង្គមស៊ីវិលឈានមុខគេមួយនៅក្នុងប្រទេសកម្ពុជា ដែលធ្វើការតាំងពីឆ្នាំ ២០១២ ជាមួយសកម្មជនសិទ្ធិមនុស្សជួរមុខដើម្បីការពារធនធានធម្មជាតិរបស់ប្រទេសកម្ពុជា។
បេសកកម្មចម្បងរបស់យើងគឺជួយ និងធ្វើការជាមួយប្រជាជនកម្ពុជាដែលមានភាពក្លាហាន និងហ៊ានប្រថុយប្រថាន ទៅលើការការពារធនធានធម្មជាតិ។  ​​  ការងារចម្បងរបស់យើងផ្តោតលើការលាតត្រដាងដល់ទស្សនិកជន​ នៅសកកម្មភាពហួសហេតុជុំវិញ ការបំផ្លិចបំផ្លាញបរិស្ថាន និងការរំលោភសិទ្ធិមនុស្ស ដែលជារឿយៗត្រូវបានផ្សារភ្ជាប់ជាមួយនឹងការអភិវឌ្ឍន៍ដើម្បីបិទបាំង ដោយកង្វះការគ្រប់គ្រងត្រឹមត្រូវ និងច្បាស់លាស់ ដែលបានកំពុងកើតមានជាបន្ដបន្ទាប់។
ទោះបីជាត្រូវបានទទួលរងការយាយីតាមអំពើចិត្តជាប្រចាំក៏ដោយ ក៏យើងនៅតែបន្តខិតខំទៅមុខ ដោយជូនដំណឹងដល់ប្រជាជនកម្ពុជារាប់លាននាក់អំពីអ្វីដែលកំពុងកើតឡើងពិតប្រាកដនៅក្រោមឈ្មោះដែលហៅថាការអភិវឌ្ឍន៍។

សូមគាំទ្រពួកយើងក្នុងការការពារធនធានធម្មជាតិរបស់ប្រទេសកម្ពុជា។

វីដេអូដែលផលិតឡើងដោយពួកយើងផ្ទាល់ អំពីយុទ្ធនាការនីមួយៗ ឬអំពីបញ្ហាបរិស្ថានដែលកំពុងត្រូវបានបំផ្លាញ បានទាក់ទាញចំនួនអ្នកចូលមើលពីគ្រប់មជ្ឈដ្ឋានយ៉ាងច្រើនគួរអោយកត់សម្គាល់ និងទទួលបានលទ្ធផលជាដំណោះស្រាយពីភាគីពាក់ព័ន្ធ។  វី​ដេ​អូ​ទាំងអស់នោះ ទទួលបានការចាប់អារម្មណ៍ និងត្រូវ​បាន​គេ​ពេញ​និយមតាមដាន​ រហូត​ដល់មានចំនួនអ្នកចូលមើល​រាប់​សែន​នាក់ ឬជួនកាលរហូតដល់​រាប់​លាន​នាក់​ផងដែរនៃប្រជាជនកម្ពុជា ក៏ដូចជាប្រជាជនទូទាំងពិភពលោក។  ក្ដីរំពឹងទុកយ៉ាងខ្លាំងរបស់យើងចំពោះរបាយការណ៍នៃវីដេអូនីមួយៗ ត្រូវបានគេនិយាយតៗគ្នា ពីផ្ទះមួយ ទៅផ្ទះមួយ ពីកន្លែងធ្វើការមួយ ទៅកន្លែងធ្វើការមួយទៀតនៅទូទាំងប្រទេស។ ក្រុមការងារប្រព័ន្ធផ្សព្វផ្សាយសង្គមរបស់ ចលនាមាតាធម្មជាតិ ដែលត្រូវបានបង្កើតឡើងដោយយុវជនកម្ពុជាទាំងស្រុង បានបង្កើតមាតិការនៃវីដេអូនីមួយៗ តាមរយៈការចុះផ្ទាល់ដល់ទីតាំងរងផលប៉ះពាល់ ពិសេសតាមរយៈមធ្យោបាយផ្សេងៗ ដែលសាធារណៈជននៅទូទាំងប្រទេស បានផ្ដល់មកកាន់ពួកយើង ក្នុងការរៀបចំផលិតជាវីដេអូ ដើម្បីអោយមានដំណោះស្រាយទៅលើបញ្ហាទាំងអស់នោះ។

 វាមិនមានអ្វីជាអាថ៌កំបាំងទាល់តែសោះ ចំពោះរូបមន្តដែលពួកយើងមានប្រជាប្រិយលើការផលិត និងផ្សព្វផ្សាយវីដេអូរបស់យើងកន្លងមក។  ពួកយើងគ្រាន់តែផ្តល់នូវខ្លឹមសារ ឬមាតិកាផ្សេងៗដែលអាចទុកចិត្តបាន ហើយមានសារៈសំខាន់ ដែលប្រជាជនកម្ពុជាមិនបានដឹង ព្រោះតែមានការលាក់បាំងព័ត៌មានដ៏សំខាន់ទាំងអស់នោះកាន់តែច្រើនឡើងៗពីសំណាក់រដ្ឋាភិបាល ដែលជាអ្នកមានតួនាទីចាំបាច់ក្នុងការបង្ហាញព័ត៌មានដ៏មានសារៈសំខាន់ទាំងអស់នោះ ទៅដល់សាធារណៈជនបានដឹង ក្នុងនាមជាម្ចាស់វាសនានៃប្រទេសកម្ពុជា។ ហើយក្នុងកាលៈទេសៈដ៏តានតឹងនៃវិសាលភាពក្នុងការផ្សព្វផ្សាយ បន្ទាប់ពីប្រព័ន្ធផ្សព្វផ្សាយឯករាជ្យមួយចំនួនត្រូវបានបិទ និងបង្ខំចិត្ដចាកចេញទៅក្រៅប្រទេស ដោយសារតែមានការធ្វើបាបពីសំណាក់អាជ្ញាធរ ជាពិសេសអ្នកដែលតែងតែហ៊ាននិយាយការពិតអំពីបញ្ហានៅក្នុងប្រទេសកម្ពុជា។ មានប្រភពប្រព័ន្ធផ្សព្វផ្សាយឯករាជ្យតិចតួចណាស់នៅក្នុងប្រទេស ដែលកំពុងមានវត្ដមាននៅក្នុងប្រទេស ខណៈប្រព័ន្ធផ្សព្វផ្សាយភាគច្រើននៅក្នុងប្រទេស កំពុងផ្សព្វផ្សាយព័ត៌មានក្លែងក្លាយ ហើយត្រូវបានអូសទាញដោយគណបក្សកាន់អំណាច។

បើទោះបីជាមានការគម្រាមកំហែងបែបនេះក៏ដោយ ក្រុមសកម្មជនដ៏ក្លាហានរបស់យើង បដិសេធមិននៅស្ងៀម ហើយបានបន្ដរាយការណ៍ព័ត៌មាន​អំពី​យុទ្ធនាការ​របស់ពួកគេជាបន្ដបន្ទាប់។ ពួកគេបានស៊ូទ្រាំ និងជំនះរាល់ការយាយី ការជិះជាន់ ការធ្វើទុក្ខបុកម្នេញគ្រប់រូបភាព រហូតដល់ជាប់ពន្ធនាគារផងដែរ។ ភាពសកម្ម និងក្លាហានរបស់ពួកគេ កំពុងផ្ដល់គម្រូដ៏អស្ចារ្យទៅកាន់អ្នកតស៊ូមតិដើម្បីសិទ្ធិសេរីភាព ជាពិសេសយុវជនដែលចង់បានសេរីភាពពិតប្រាកដជាដើម។

យើងផ្តល់នូវអ្វីដែលប្រជាជនកម្ពុជាចង់បានរួមមាន៖ របាយការណ៍ដែលពឹងផ្អែកលើភស្តុតាង ដែលបង្ហាញពីការធ្វេសប្រហែស និងអំពើពុករលួយ ដោយអ្នកដែលមានធនធាន និងអ្នកមានអំណាច នៅក្នុងប្រទេសកម្ពុជាទៅលើបញ្ហាបរិស្ថាន។

លទ្ធផលកើនឡើង បន្ទាប់ពីវីដេអូរបស់យើងបានដឹងលឺដល់ប្រជាពលរដ្ឋ ដោយរំលេចយកបញ្ហាសំខាន់ៗដែលមិនអាចមិនអើពើបាន។  ការចាប់អារម្មណ៍លើប្រព័ន្ធផ្សព្វផ្សាយសង្គមដ៏ធំដែលយើងបានទាក់ទាញ បានផ្តល់នូវរឿងរ៉ាវដល់ប្រព័ន្ធផ្សព្វផ្សាយសំខាន់ៗ ដើម្បីផ្សព្វផ្សាយបន្ដទៅដល់មនុស្សនៅគ្រប់ទីកន្លែងបានដឹងកាន់តែច្បាស់អំពីបញ្ហាទាំងអស់នេះ។  មធ្យោបាយទាំងអស់នេះគឺបើកអោយមានភាពទូលំទូលាយ ដើម្បីជម្រុញអោយមានការដោះស្រាយអំពីបញ្ហាបរិស្ថាន និងសិទ្ធិមនុស្ស ដែលយើងទាំងអស់គ្នាចង់បាន។  សម្ពាធផ្នែកនយោបាយដែលបានអនុវត្តដោយរដ្ឋាភិបាលសព្វថ្ងៃ និងជាពិសេសចំពោះបុគ្គលនៅក្នុងការយកចិត្តទុកដាក់ចំពោះបញ្ហាទាំងអស់នេះ បាននាំឱ្យមានការផ្លាស់ប្តូរឥរិយាបថ និងគោលនយោបាយជាបន្ដបន្ទាប់។ 

សមិទ្ធផល និងភាពជោគជ័យមួយចំនួននៃវីដេអូខ្លីរបស់យើង ក្នុងរយៈពេលប៉ុន្មានឆ្នាំចុងក្រោយនេះ បានជម្រុញឲ្យរដ្ឋាភិបាលបោះបង់ចោលផែនការសាងសង់ទំនប់វារីអគ្គិសនី នៅក្នុងព្រៃធំបំផុតរបស់ប្រទេសកម្ពុជា។ បញ្ចប់ការក្លែងបន្លំ និងការបំផ្លិចបំផ្លាញ ការទាញយក និងការនាំចេញខ្សាច់សមុទ្រទៅក្រៅប្រទេស។ ក្រៅពីនេះយើងបន្ដជម្រុញឱ្យរដ្ឋាភិបាលបញ្ឈប់ការបង្ហូរទឹកស្អុយដែលមិនបានឆ្លងកាត់ការចម្រោះ ហូរចូលទៅក្នុងឆ្នេរដ៏បរិសុទ្ធ និងមួយចំនួនធំទៀត រួមជាមួយចុងក្រោងគឺការផ្សព្វផ្សាយពីកោះដ៏ស្រស់ស្អាតនៅកម្ពុជា គឺកោះកុងក្រៅ។ល។

ដើម្បីទស្សនាវីដេអូទាំងអស់របស់ពួកយើងសូម ចុចទីនេះ, ឬក៏ចូលទៅកាន់គេហទំព័រហ្វេសប៊ុក  ចុចទីនេះ.